 |
| |
| |
 |
“In nomine Domini amen. Universis et singulis pateat evidenter et sit notum, quod die dationis praesentium illustris et generosa domina Catherina de Borbon duxissa Gelriae, mente et ratione sana, licet corpore aliqualiter languens, coram domino suo Adolpho Gelriae duce, coniuge suo, et quibusdam aliis infrascriptis ac me fratre Adriano de Mera, sacrae theologiae professore ordinis praedicatorum, eiusdem duxissae confessore, ad hoc specialiter vocatis, constituta, desideravit et instantissime, pro sua ultima voluntate et testamento sive codicillis, paroechialem ecclesiam sancti Stephani protomartyris Novimagensem Coloniensis dioecesis, ad gloriam et honorem omnipotentis Dei ac gloriosae virginis Mariae matris suae benedictae dictique sancti Stephani, quem in singulari honore prae aliis sanctis habuit et amplius honorare voluit, in collegiatam et capitularem, ut divinus cultus in ea susciperet incrementum, optavit erigi ac privilegiis et libertatibus diversis decorari, et ad hoc nonnulla bona pro competentia et canonicorum sustentatione, videlicet decimas novales sub et infra imperium Novimagense ac infra Mosam et Walam, nec non eorum locorum decimas minores consistentes, cum quadam parte silvae sive nemoris decem vel circiter hoeven pro combustibilibus, atque paroechiales ecclesias de Cuyck, Boenyngen et Ewick ad praesentationem domini ducis Gelriae spectantes eidem ecclesiae Novimagensi erigendae incorporari, cum quibusdam aliis annuis frumentorum, siliginis et havenae in terra Kesselensi ac alibi sitis perpetuis redditibus, pro animae suae salute ac sua parentumque suorum perpetua memoria dedit, deputavit et assignavit, cum assensu et consensu dicti domini sui ducis Adolphi, approbantis et in praemissa consentientis ac ea suis propriis expensis adimplere et perficere in manibus eius promittentis, seque in eadem ecclesia dum eam mori contigerit, ut suum desiderium melius adimpleri possit et debeat, ut asseruit, sepeliri eligit.
Desideravit similiter, quod conventus fratrum ordinis praedicatorum in Novimagio in vita et in observantia verae regulae beati Dominici reformaretur et reformari voluit.
Deputando ad praemissa suae ultimae voluntatis sive codicilli executores praefatum dominum Adolphum ducem, praesentem et acceptantem, suosque heredes et in ducatu Gelriae successores. Acta sunt haec in castro Novimagensi praesentibus ibidem generosis ac discretis viris dominis Ottone de Bylant magistro curiae, Iohanne de Rossem, militibus et consiliariis, Theoderico de Brakel secretario, ac Nammanno Henrici presbytero cappellano dicti domini Adolphi ducis, et aliis de familia quam pluribus astantibus, vocatis et rogatis.
 |
In cuius rei evidens testimonium et fidem praemissorum, sigillum meum solitum et consuetum praesentibus appendi et me<a> propria manu subscripsi, anno Domini millesimo quadringentesimo sexagesimo nono, die decima quarta mensis Maii.”
“Ego frater Adrianus de Mera supra nominatus hac mea manu propria teste, praemissa omnia et singula ita facta et dicta fuisse protestor esse vera.”
Handschrift:
- Arnhem, Gelders Archief, Archief van de Rekenkamer, blok 0243, inv.nr. 1244.
Literatuur:
- Nijhoff, I.A., Gedenkwaardigheden uit de geschiedenis van Gelderland door onuitgegevene oorkonden opgehelderd en bevestigd, dl. 4, Arnhem: I.A. Nijhoff, 1847, blz. 426–428, nr. 477.